Ku muhingamo wo kuri uno wa gatanu igenekerezo rya 15 Ruhuhuma 2019 umurwi Messager Ngozi wari uramutse wakira benewabo ba Messager Bujumbura ku kibuga Urukundo kiri I Ngozi,mw’ihiganwa ry’umupira w’amaguru ry’icicaro ca mbere aho ryari rigeze ku musi waryo wa 22.Umurwi Messager Ngozi ukaba watsinze ata mbabazi na nkeya zigiyemwo,ibitsindo bitanu vyose kuri kimwe (5-1).
Messager Ngozi wabanje gukanguka aho wabanje kwinjizwa igitsindo n’abashitsi,umukinyi Aimé Gakiza akaba yaciye mu ryahumye abakinyi b’inyuma n’umunyezamu Bienvenu,bahindukiye basanga umupira washitse mu rusenga kera.Igice cambere kikaba carinze gihera Messager Ngozi itagomboye.
Mu gice kigira kabiri, abamenyereza ba Messager Ngozi baje bahinduye umukenyuro, icabonetse n’uko boba babwirije abakinyi babo gukinira cane mu gice c’ikibuga ca Messager Bujumbura ahegereza izamu bacishije imipira ku mpande.Inyuma y’ikosa ryakorewe ku rwinjiriro rwa mukorumbone, Iddy Museremu yateye umupira w’umuterekano neza cane ivyagoye umunyezamu wa Messager Bujumbura kuwufata, biba bibaye igitsindo kimwe ku kindi(1-1,56’).Uko kugomborwa igitsindo kwa Messager Bujumbura kwayibereye nk’intango y’inzira y’umusalaba kuko wahavuye winjizwa ibindi bitsindo bine,urukino ruhera Messager Ngozi itsinze bitanu kuri kimwe (5-1).Aba nibo bakinyi binjije ivyo bitsindo n’ababahereje imipira imipira(passeurs décisifs).
Igitsindo ca mbere: Iddy Museremu (Umupira w’umuterekano)
Igitsindo ca kabiri: Iddy Museremu (yahawe umupira na Olivier Bayizere)
Igitsindo ca gatatu: Cedric Danny Urasenga (yahawe umupira na Rahim Nsengiyumva)
Igitsindo ca kane: Fataki Alli Intelligent (yahawe umupira na Olivier Bayizere)
Igitsindo ca gatanu:Fataki Alli Intelligent(yahwe umupira na Ismael Nizigiyimana)
Uku niko izindi nkino z’umusi wa 22 w’ihiganwa:
Kuwa gatanu 15-02-2019
-Messager Ngozi 5-1 Messager Bujumbura
-Rukinzo 0-1 Bumamuru FC
Kuwa gatandatu 16-02-2019
–Athletico Olympic 3-0 Olympic Star
-Flambeau de l’Est 1-2 Flambeau du Centre
-Musongati 0-1 Vital’o
-Kayanza United 0-2 Bujumbura City
-Les Lierres 1-0 Ngozi City
Kuw’Imana 17-02-2019
–Lydia Ludic S4Africa?-? Aigle Noir
Elysé Niyubahwe
Académie Le Messager