Mu mpera z’indwi iheze niho hatangura neza na neza igice co gusubiriza(phase retour) mw’ihiganwa rikuru ry’umupira w’amaguru ryo mu Burundi.Imirwi yo muri Académie Le Messager nta n’umwe washoboye kuronka amanota atatu kuko ku musi wa gatandatu Messager Bujumbura yanganije  na Les Jeunes Athlétiques ubusa ku bundi (0-0) nayo kuri uno w’Imana Messager Ngozi yagiye kunganiriza na Flambeau de l’Est ku kibuga cayo mu Ruyigi ubusa ku bundi (0-0),Flambeau du Centre nayo yatsindiwe kuri Stade Ivyizigiro na Vital’o igitsindo kimwe ku busa (1-0).Yussuf Hazikizimana batazira Malouda akina inyuma muri Messager Ngozi yambwiye Radio Umuco FM inyuma y’urwo rukino ko bagowe n’ikibuga « Stade Urumuri » kitari kimeze neza hamwe n’umuhagarikizi atavyigenjejemwo neza ; ku rundi ruhande muri Flambeau du Centre bavugako ataco babuze ngo batahukane intsinzi kiretse amahirwe n’umugisha vyonyene,nkuko bivugwa na Benny Irakoze myugariro w’uwo murwi.

Umurwi Messager Ngozi wagumye mu kibanza ca mbere n’amanota 40 hakurikira Lydia Ludic Burundi ifise 38 na Aigle Noir ikiri mu kibanza ca 3 n’amanota 37 inyuma yo gutsinda Delta Star 2-0 kuri uno w’Imana.

Flambeau du Centre nayo iri mu kibanza ca 11 n’amanota 18

Messager Bujumbura  yagumye mu kibanza ca 14 n’amanota 14 nyene.

Inkino zimirije :

-LLB vs Flambeau du Centre :Kuwa 6  27 Nzero 2018,Stade Prince Louis,Isaha 10

-Les Lierres vs Messager Ngozi :Kuwa 6  27 Nzero 2018,Stade Prince Louis,Isaha 10

-Messager Bujumbura vs Delta Star :Dimanche 28 Jan 2018,Stade Prince Louis,Isaha 8

Elysé Niyubahwe